,

Vil du vere med på å bidra til utvikling i Sunnfjord?

Trivast du med å vere der det skjer? Har du erfaring frå forretningsutvikling og vil bidra til at fleire oppstartsbedrifter i vår region lukkast?

Då håper vi å høyre frå deg!

Som vår nye forretningsviklar/prosjektleiar vil du blant anna få jobbe med dette:
• Vere rådgjevar for etablerarar og vekstbedrifter
• Evaluere nye forretningsidear og hjelpe til med å vidareutvikle dei
• Identifisere muligheiter, starte opp og leie ulike prosjekt som bidreg til vekst i regionen
• Samarbeide med næringslivet og relevante samfunnsaktørar
• Delta i ulike prosjekt relatert til utvikling i regionen

Det viktigaste er at du verkeleg har lyst til å bidra til at næringslivet i Sunnfjord veks og utviklar seg.

Utover det tenker vi at du kanskje har utdanning innan økonomi, innovasjon, entreprenørskap, prosjektleiing eller noko tilsvarande. Har du erfaring frå bedriftsrådgjeving, forretningsutvikling eller prosjektleiing i tillegg er det strålande.

Sunnfjord Utvikling har mellom anna ansvar for førstelinjetenesta til Sunnfjord kommune. Vi skal hjelpe gründerar i etableringsfasen og legge til rette for ny aktivitet i eksisterande næringsliv, og det er der du kjem inn i bildet.

Du vil få ein variert arbeidskvardag i lag med særs engasjerte kollegaer på Peak Sunnfjord, eit innovativt klyngemiljø med rundt 30 bedrifter og til saman over 100 tilsette i sentrum sør i Førde.

Har du spørsmål om stillinga kan du ta kontakt med dagleg leiar Gunhild Berge Stang på tlf. 976 53 785 eller gunhild.berge.stang@sunnfjord.no.

Interessert? Send ein kortfatta søknad og CV til kathe.arnesen@sunnfjord.no

Søknadsfrist:  utgått

Vil du bli meir kjent med oss? Følg oss gjerne på LinkedIn, Facebook og Instagram.

,

Jølster, Naustdal og Gaular! Velkomen til ope informasjonsmøte i Sunnfjord Utvikling!

Sunnfjord Utvikling ønskjer å invitere bedrifter, enkeltpersonar og innbyggjarar, politikarar, organisasjonar og institusjonar til eit ope møte i Jølster, Naustdal og Gaular.

Du møter oss her:

  • Jølster – Skei Hotel, måndag 14. november kl 18.00-20.00.
  • Gaular – Gamle kommunehuset på Sande tysdag 15. november kl 19.00-21.00.
  • Naustdal – Dalen næringssenter 16. november kl 19.00-21.00.

Vi vil informere om aktivitetane i Sunnfjord Utvikling, med vekt på nokre av dei pågåande satsingane i selskapet:

Oppfølging av Nærings- og ringverknadsanalysen, «Vekstregionen Sunnfjord»

  • Profileringsprosjekt
  • Mineralinkubator
  • Sunnfjord Innovasjonsarena AS
  • Nye prosjekt for grøn omstilling
    • Moglegheitstudie for større grøne industrietableringar i Sunnfjord-regionen
    • Sirkulærprosjekt på Campus Verftet
    • Berekraftsrapportering i bedriftene – korleis kome i gang
  • Nasjonalt senter for yrkesfag
  • Tilleggsnæring landbruk
  • Remote Sunnfjord og rekruttering
  • Reiseliv og Visit Fjordkysten Sunnfjord
  • Kveldsøkonomi og Sunnfjord U40

Ny Strategisk næringsplan for Sunnfjord kommune 2023-2027
• Presentasjon av framlegg til hovudsatsingar i ny næringsplan
• Drøftingar og innspel

Vi presiserer at dette er eit ope møte, og vi er derfor takksame om de vil sende invitasjon vidare i dykkar nettverk.

Det vil bli servert kaffi med noko attåt.

Lenke til påmelding for Jølster på Skei hotel, frist 11. november: Påmelding Jølster
Lenke til påmelding for Gaular på Sande, frist 12. november: Påmelding Gaular
Lenke til påmelding for Naustdal, frist 13. november: Påmelding Naustdal

Vi håpar på godt frammøte og gode drøftingar!

,

Workshop om kveldsøkonomien i Førde 17. november

Ein svensk rapport viser at dei distriktskommunane som lukkast best med tilflytting og rekruttering, er dei som har ein levande og velfungerande kveldsøkonomi.

Her i Sunnfjord jobbar vi kontinuerleg med rekruttering og tilflytting, og meiner difor at det er viktig å vidareutvikle og synliggjere det tilbodet vi allereie har – og til det vil vi gjerne ha dykkar innspel.

Det finst fleire eksempel på at tilflyttarar har flytta vekk igjen fordi dei ikkje fann eit sosialt nettverk dei kjende seg heime i, eller fordi dei ikkje fann fritidsaktivitetar eller gode møteplassar her (til dømes Solveig)– og det må vi gjerne noko med!

Bli med på workshop 17. november kl. 13.30-15.30 på Peak Sunnfjord
Vi har eit godt grunnlag å byggje vidare på her i Førde, men det er framleis mykje å jobbe med for at det skal bli optimalt – og vi startar med ein workshop for å finne ut kva vi må fokusere på for å få til ein skikkelig bra kveldsøkonomi.

Jobbar du i ei bedrift som er ein del av kveldsøkonomien, eller brenn du for temaet og ynskjer å bidra? Da håper vi at du vil vere med og bidra med di erfaring og dine synspunkt på denne workshopen.

Meld deg på her.

Kva er kveldsøkonomi?
Kveldsøkonomi er eit omgrep for alt av aktivitetar og tilbod innanfor eit avgrensa geografisk område i/rundt sentrum etter klokka 17 og i helgane, og som ikkje er knytta til kjøpesenter, kiosk eller bensinstasjon.

Det første ein tenker er kanskje at det dreier seg om uteliv og serveringsbransjen, men det handlar om mykje meir enn det – vi snakkar kultur, uformelle møteplassar som til dømes quiz eller ein skatepark, idrettstilbod, reiseliv, frivillegheita, parkar, elvesti og mykje meir.

Kva skal til for å få til ein god kveldsøkonomi?
For å skape ein kveldsøkonomi som bidreg positivt til både bulyst og blilyst, er det 4 element som må vere tilstades:

  • Eit variert og tilstrekkeleg stort tilbod av aktivitetar og møteplassar som ligg nært kvarandre – og et tilbod som er tilpassa det folk vil ha
  • Kontinuitet & forutsigbarheit – at det er gjentakande, faste aktivitetar, slik at ein rekk å bygge opp ei fast gruppe brukarar
  • At det er lett for både tilflyttarar og lokale å finne informasjon om kva som skjer
  • At dei som bur i området nyttar seg av tilbodet

I tillegg må det finnast eit transporttilbod som gjer det mogeleg å nytte fritidstilbodet utan å måtte vere avhengig av bil, og der siste bussen heim ikkje går allereie klokka 21.30 ein fredagskveld.

Har du spørsmål om workshopen, ta kontakt med Kathe Arnesen på tlf. 98 88 36 88 eller kathe.arnesen@sunnfjord.no.

,

Velkomen til ope informasjonsmøte i Sunnfjord Utvikling!

Sunnfjord Utvikling ønskjer å invitere bedrifter, enkeltpersonar og innbyggjarar, politikarar, organisasjonar og institusjonar til eit ope møte på Sunnfjord Hotel, tysdag 25. oktober kl 18.00-20.30.

Vi vil informere om aktivitetane i Sunnfjord Utvikling, med vekt på nokre av dei pågåande satsingane i selskapet:

Oppfølging av Nærings- og ringverknadsanalysen, «Vekstregionen Sunnfjord»
• Profileringsprosjekt
• Sunnfjord Innovasjonsarena AS
• Mineralinkubator
• Nye prosjekt for grøn omstilling
– Moglegheitstudie for større grøne industrietableringar i Sunnfjord-regionen
– Sirkulærprosjekt på Campus Verftet
– Berekraftsrapportering i bedriftene – korleis kome i gang
• Kveldsøkonomi og Sunnfjord U40
• Nasjonalt senter for yrkesfag

Ny Strategisk næringsplan for Sunnfjord kommune 2023-2027
• Presentasjon av framlegg til hovudsatsingar i ny næringsplan
• Drøftingar og innspel

Vi presiserer at dette er eit ope møte, og vi er derfor takksame om de vil sende invitasjon vidare i dykkar nettverk.

Det vil bli servert kaffi med noko attåt.

Lenke til påmelding, frist 21. oktober: https://no.surveymonkey.com/r/OpeInformasjonsmote

Vi håpar på godt frammøte og gode drøftingar!

,

Kurs i employer branding og LinkedIn som rekrutteringsverktøy

Jobbar du med rekruttering i di bedrift? Då har vi ei gladmelding til deg: No kan du få med deg to kurs som kan hjelpe deg i rekruttingsarbeidet, og det på ein og same dag!

I samarbeid med Framtidsfylket og med støtte frå Sparebankstiftinga Sogn og Fjordane har vi sett opp ei kursrekke som skal bidra til at du som rekrutterer har den kunnskapen du treng for å få tak i dei folka du treng.

No står to nye kurs for tur: Employer branding og LinkedIn som rekrutteringsverktøy.

Sett av ein dag til kompetanseheving og få nyttig kunnskap og praktiske tips og triks som kan vere til nytte for deg i arbeidskvardagen.

Kursa vert arrangert 4 stader i Vestland denne hausten:

  • Førde: 1. november, Thon Hotel Førde
  • Odda: 2. november, Smelteverket 57, Odda
  • Sogndal: 24. november, info om kurssted kjem seinare
  • Nordfjordeid: 25. november, info om kurssted kjem seinare

Du kan melde deg på eitt av kursa, eller begge – vi anbefaler sjølvsagt at du får med deg begge!

Begge kursa er gratis for medlemmar i Rekutteringsforum Sunnfjord (max 2 deltakarar pr. medlemsbedrift). Det vert servert varm lunsj til dei som deltek på begge kursa.

Kurs i employer branding (09.00 – 12.00)
Alle arbeidsgjevarar har eit employer brand, eller ei merkevare for korleis det er å jobbe i akkurat di bedrift.

Spørsmålet er på kva måte ein brukar det til sin fordel og korleis employer branding kan styrke din rekrutteringsstrategi. Kva er det og korleis påverkar selskapet sitt omdøme rekruttering av nye tilsette?

Kurset vil gje deg innsikt i:

  • Korleis du kan bli «den arbeidsgjevaren alle vil arbeide for»?
  • På kva måte EP kan bidra til å redusere kostnaden for tilsettingar?
  • Korleis tiltrekke seg dei største talenta?
  • På kva måte ein kan få tilsette til å bli verande i bedrifta ved å fokusere på merkevara?

Kurshaldar er Hans Petter Stub, Head of employer branding i Whyidentify.

Meld deg på kurs i employer branding: Førde 1. november, Odda 2. november, Sogndal 24. november eller Nordfjordeid 25. november.

Hans Petter er ein av Norges mest erfarne konsulentar innan employer branding og ofte brukt som foredragshaldar. Han har undervist i employer branding på Universitetet i Sør Øst-Norge, Handelshøyskolen BI og Campus Kristiania. Han held kurs i regi av HR Norge og blei i år den første vinnaren av æresprisen i Magnet Awards – NM i employer branding.

 

Meld deg på kurs i employer branding i Førde 1. november, Odda 2. november, Sogndal 24. november eller i Nordfjordeid 25. november.

Kurs: LinkedIn som rekrutteringsverktøy (13.00 – 15.30)
Visste du at det er ca. 88 000 personar i Vestland fylke som er på LinkedIn?

Det er ein stor kandidatbase å søke i! For ikkje å snakke om at det er ein god kanal for employer branding og stillingsannonsar.

På dette kurset lærer du mellom anna:

  • Korleis du kan bruke LinkedIn når du skal rekruttere
  • Korleis du kan søke etter relevante kandidatar
  • Ulike typar stillingsannonsar ein kan bruke på LinkedIn
  • På kva måte du sjølv og dine kollegaer kan bli gode ambassadørar for bedrifta på LinkedIn
  • Smarte tips & triks

Kurshaldar er Kathe Arnesen, prosjektleiar i Rekrutteringsforum Sunnfjord.

Kathe har meir enn 10 års erfaring frå media, marknadsføring og strategisk kommunikasjon. Ho har ei glødande interesse for digitalisering og har leia fleire prosjekt innan digitalisering og innovasjon. Ho er ein erfaren kurs- og foredragshaldar innan tema som framtidas arbeidsliv, rekruttering, LinkedIn, sosiale medium og innhaldsmarknadsføring.

Meld deg på kurs i LinkedIn som rekrutteringsverktøy i Førde 1. november, Odda 2. november, Sogndal 24. november eller Nordfjordeid 25. november.

Kursprisar:
Employer branding: Gratis for medlemmar i Rekrutteringsforum Sunnfjord. For medlemmar i Framtidsfylket: 1750,- og for ikkje-medlemmar 2 250,-

LinkedIn som rekrutteringsverktøy: Gratis for medlemmar i Rekrutteringsforum Sunnfjord. For medlemmar i Framtidsfylket: 1250,- og for ikkje-medlemmar 1750,-

Pakkepris for begge kursa: Gratis for medlemmar i Rekrutteringsforum Sunnfjord. For medlemmar i Framtidsfylket: 2500,- inkl. lunsj, for ikkje-medlemmar 3500,- inkl. lunsj.

Har du spørsmål om kursa, kontakt Kathe Arnesen i Rekrutteringsforum Sunnfjord på tlf. 98 88 36 88.

Vel møtt!

,

Prosessen med ny næringsplan er i gang

Sunnfjord Utvikling og Sunnfjord kommune startar no arbeidet med ein ny strategisk næringsplan for Sunnfjord kommune.

Dette vil vere det viktigaste styringsverktyet for korleis Sunnfjord Utvikling og Sunnfjord kommune prioriterer og arbeider dei neste 4 åra.

Målet er å ha ein ferdig vedteken plan våren 2023.

Skal vi lukkast med å vere relevante og nyttige for heile næringslivet i Sunnfjord treng vi innspel frå dykk til denne planen. Vi kjem difor til å arrangere fleire samlingar og treffpunkt – meir info om dette kommer litt seinare.

Fristen for høyringsinnspel er 22. november 2022.

Her kan du lese meir om planprogrammet og korleis du kan sende inn innspel.

Vi ser fram til eit godt samarbeid med næringlivet i arbeidet gjennom vinteren!

Her er våre forslag til strategiske retningar for fornying og vekst:

Næringsattraktiv kommune – kommunen og Sunnfjord Utvikling har ei viktig rolle i å vere ein aktiv samarbeidspart for næringslivet og innbyggjarane
Styrka samarbeid i regionen – for å få til større satsingar må næringslivet og kommunane i regionen samarbeide tett, målretta og strukturert
Naturen som ressurs for grøn næringsutvikling – Sunnfjord har store naturressursar, fornybar energi, areal og mineral, og eit landbruk som byr på opplevingar i reiseliv. Berekraftig bruk av desse i kombinasjon med gode lokale kompetansemiljø, gir store utviklingsmoglegheiter inn i ei tid der dette er nøkkelressursar i grøn næringutvikling og grøn omstilling
Entreprenørskap og innovasjon – Sunnfjord har lang tradisjon for entreprenørskap, godt samarbeid i næringslivet, og klynger som samlar ulike fagmiljø.
Rekruttering og attraktivitet – med Førde som regionsenter har vi ein motor for urbanisering, og tiltrekking av arbeidskraft.

Våre særskilde fortrinn er:

  • Naturen som ressurs for næringsutvikling
  • Entreprenørskap og innovasjon
  • Førde som regionsenter

Vi skal styrke grunnmuren for næringsutvikling ved å:

  • Styrke arbeidet med å vere ein næringsattraktiv kommune
  • Styrke samarbeidet i regionen

 

,

Heilekonferansen 2022 | 25. – 26. august

Heilekonferansen samlar næringslivet i Sogn og Fjordane til foredrag og paneldebattar med lokale, regionale og nasjonale aktørar, over to dagar, frå lunsj til lunsj. Fjorårets konferanse var fullsett, med «meteren» som rettesnor. I år har vi plass til fleire – faktisk heile regionen!

Vi legg bak oss to år prega av pandemi, og går ut av den med nye kriser, endringar og utfordringar i sikte. Korleis påverkar verda rundt oss næringslivet i regionen vår? Og kva med oss sjølv her i Sogn og Fjordane? Kva gror og veks her? Kva moglegheiter ser vi, og kva moglegheiter burde vi sett? Konferansen dukker og ned i buzz-ordet berekraft. Kva konkret kan du som bedrift gjere for å drive berekraftig, men god butikk? I år er derfor hovudtema for konferansen:

Investeringslyst og risikokapital | Visjonær og praktisk berekraft | Kulturbygging | Krise og endring

På konferansen møter du mellom anna:

Føredragshaldarar Heilekonferansen kvinner og menn i leiiande stillingar

I tillegg inviterer Heilekonferansen torsdag kveld til 4-retters bankett med skreddarsydd vinpakke, kuratert av sommelier Christer Berens. Konferansier for kvelden er komikaren Lars Berrum og det blir nydeleg musikk med artisten Ingrid Olava.

Arrangør av Heilekonferansen er FINS Aktivitet og Førde Industri- og Næringssamskipnad.

Les meir og meld deg på her: Heilekonferansen 2022

Ung mannlig komiker i blå t-skjorte

For medlemmar av nettverka Sunnfjord U40 og Sogn U40 vert det eit eige vorspiel med Lars Berrum torsdag før middag. I tillegg får medlemmar av U40 10% rabatt på heile Heilekonferansen. Med andre ord, ta med dine unge lovande å konferanse!

Er dei ikkje allereie medlem av Sunnfjord eller Sogn U40 blir dei det her: Bli medlem Sunnfjord U40 // Bli medlem av Sogn U40

,

Kurs: Rekrutteringsprosessen frå A til Å, med hovudfokus på intervjuteknikk

Bli betre på å gjennomføre jobbintervju!

Jobbar du med rekruttering i di bedrift og ønskjer å få meir struktur på prosessen? Då er dette kurset for deg. Det er lagt opp til ein teoridel på førmiddag og ein valfri workshop etter lunsj der du kan få praktisk trening i å gjennomføre intervju.

Kurset passar både for deg som arbeider med tilsettingar dagleg og deg som berre rekrutterer av og til.

Kursinnhald:

  • Presentasjon av elementa i rekrutteringsprosessen
  • Kort om jobbanalyse, som er avgjerande for vellukka rekruttering
  • Førstegangsintervjuet – «Den gode samtalen»: Førebuing, fallgruver du bør unngå, etisk kommunikasjon, kroppsspråk og evaluering m.m.
  • Andregangsintervjuet:
    • Strukturert eller delvis strukturert intervjuteknikk,
    • Korleis komme meir i djupna på kandidaten sin personligheit,
    • Kva har vi ikkje lov til å spørre om i intervjuet?
    • Bruk av testar i forkant av intervjuet
    • På kva måte følge opp kandidatar som ikkje går vidare m.m.
  • Referanseintervjuet og bakgrunnssjekk
  • Bli god på å ta i mot nye tilsette

Når: 2. juni kl. 09.00 til  kl 12.30.
Stad: Scandic Sunnfjord hotel og spa
Gratis for medlemmar i Rekrutteringsforum Sunnfjord (1 person frå kvar medlemsbedrift).
Pris for medlemmar i Framtidsfylket kr 1 750,- / ikkje medlem kr 2 250,-

Valfri workshop:
Praktisk trening i intervjuteknikk (13.30 – 15.00). NB: max 16 deltakarar

Vil du bli betre på å gjennomføre intervju? Då har du moglegheit til å få praktisk trening og tilbakemelding fra fagpersonar.

  • Gjennomgang i plenum av gjennomføringen av intervjuet
  • Vi deler i grupper på 3-4 personar
    • Ein intervjuar
    • Eit intervjuobjekt
    • Ein til to observatørar som evaluerar intervjuaren ut frå valde kriterium
  • Oppsummering i plenum

Gratis for medlemmar i Rekrutteringsforum Sunnfjord (1 person frå kvar medlemsbedrift).
Pris for workshop med intervjutrening for medlemmar i Framtidsfylket kr 950,- / ikkje medlem kr  1250,-
Dei som deltek på workshopen får lunsj.

Meld deg på her

Kursinstruktør: Elin Hagene, Hagene & partners
Elin Hagene har lang fartstid innan rekrutteringsfaget. Dei siste 15 åra har ho arbeidd med rekruttering og tilsettingar mellom anna som fagsjef for rekruttering i Norges tredje største bemanningsbyrå.

Ho underviser i rekrutteringsprosessen og bruk av testverkty og har spesialisert seg på kurs i strukturert intervjuteknikk. Elin er DNV-sertifisert rekrutterar og har sertifisering for Human Content og Aon sine verktøy. Ho har også ein bachelor i internasjonalisering og marknadsføringsleiing frå BI med organisasjonspsykologi som en del av fagkretsen.

Arrangør: Framtidsfylket og Rekrutteringsforum Sunnfjord

Kontakt Framtidsfylket:
Linda Hovland mob: 99 01 78 52, e-post: linda@framtidsfylket.no

Kontakt Rekrutteringsforum Sunnfjord
Kathe Arnesen mob: 98 88 36 88, e-post: kathe.arnesen@sunnfjord.no

,

Coronamidler: Runde 7 av kommunal kompensasjonsordning er no lyst ut. Frist 27. april.

Sunnfjord kommune er i sjuande runde tildelt kr. 784.000 til kommunal kompensasjonsordning.

Målet med ordninga er å sette kommunane raskt i stand til å avhjelpe situasjonen for lokale verksemder for å oppretthalde arbeidsplassar og viktig kompetanse i bedrifter. Midlane skal hjelpe lokalt næringsliv gjennom ein ny periode med inngripande koronatiltak.

Ordninga skal og fungere som ei kommunal ventilordning, for å kompensere lokale verksemder som heilt eller delvis har falle utanfor dei generelle kompensasjonsordningane eller lønnsstøtteordninga. Kommunane er særleg bedt om å vurdere kompensasjonsbehovet i verksemder som har falle heilt eller delvis utanfor dei generelle kompensasjonsordningane, som bl.a. nystarta bedrifter.

Søknadsprosessen er enkel og tilskotet er i stor grad tillitsbasert. Nedanfor kan du lese meir om kriteria og prioritering for tildeling av støtte.

Mål for ordninga (lyst ut som nasjonal notifisert ordning):
Ordninga skal sikre tilgang til likviditet i verksemder og dempe dei økonomiske konsekvensane av Covid-19-pandemien, ved hjelp av direkte tilskot. Ordninga skal rettast mot lokale verksemder.

Sunnfjord kommune har sett følgande kriterier for tildeling i runde 7:

Dette kan tilskotet dekke:
Midlane skal brukast på tiltak for lokale verksemder, etablerarar og andre næringsaktørar som:

  • har tap av omsetning/inntekt som følge av Covid-19-pandemien eller den påfølgande økonomiske nedgangen
  • har auka kostnader som følgje av tiltak for å unngå spreiing av Covid-19, og kostnader direkte knytt til Covid-19-lågkonjunktur
  • har tap av varer pga. Covid-19-pandemien

Målgruppe for den 7. runden – kven kan søke
Bedrifter i bransjar med næringskode 55,56, 79, 93, 90 og 82.3, som kan dokumentere at dei har lidd eit økonomisk tap som følgje av nasjonale smittevernstiltak i perioden januar-februar 2022:

  • Overnattingsverksemder, herunder hotell (næringskode 55)
  • Serveringsverksemder, herunder restaurantar og barar (næringskode 56)
  • Reisebyrå- og reisearrangørverksemder (næringskode 79)
  • Sport og fritid (næringskode 93)
  • Kunst og underholdning (næringskode 90)
  • Kongress-, messe- og utstillingsvirksomhet (næringskode 82.3)

Viss det er verksemder som openbart driv innanfor desse næringskodane, men som av ulike årsaker er registert med ein anna næringskode i Brønnøysundregisteret, vil dette bli teke omsyn til i saksbehandlinga.

Verksemder som har falle heilt eller delvis utanfor dei generelle kompensasjonsordningane, som bl.a. nystarta bedrifter, vil bli særskilt vurdert og prioritert først i denne runden.

Storleik på tilskotet:

  • Det vert sett ei øvre beløpsgrense på kr 100.000 per bedrift
  • Storleiken på tilskotet vil bli forholdsmessig vekta mot storleiken på tapet
    • Prioriterte søknader vil kunne få ein større andel av tapet dekka

Krav til søkarane:

  • Verksemda må ha forretningsadresse i Sunnfjord kommune
  • Verksemd som er del av eit konsern kan søke, men kan kun motta støtte for den økonomiske aktiviteten som er lokalisert i Sunnfjord kommune
  • Verksemda må ha tilsette eller ha innleige av personell frå same konsern
  • For enkelmannsføretak må føretaket si inntekt vere minst ein av eigarane si hovudinntekt
  • Verksemda må ikkje vere under konkursbehandling eller under frivillig/tvungen avvikling
  • Verksemda må ikkje ha uteståande skattar og/eller avgifter
  • Opplyse om kva anna offentleg støtte føretaket har motteke i løpet av 2019, 2020, 2021 og 2022, og korleis denne støtta er heimla (bagatellmessig støtte eller notifisert ordning). Inngår selskapet i eitt konsern må støtte på konsernnivå oppgjevast.
  • Verksemda kan ikkje bli kompensert via andre ordningar for det tapet det vert søkt om støtte til gjennom denne ordninga. For eksempel kan ikkje verksemda motta støtte frå denne ordninga og andre covid-19 ordningar (som lønnsstøtte og den generelle komp.ordninga) som direkte eller indirekte dekkar dei same kostnadene for den same perioden. Verksemder som mottar lønnsstøtte kan framleis søke om å få dekka tap i omsetnad og øvrige ekstra kostnader som følgje av nedstenginga, men ikkje kostnader til lønn.

Krav til dokumentasjon

For å kvalifisere til støtte må følgande dokumentasjon leggast med som vedlegg til søknaden:

  • Perioderekneskap per februar 2020
  • Perioderekneskap per februar 2022
  • Skatteattest RF 1316 (attest for skatt og meirverdiavgift) datert 31.03.22 eller seinare. Viser denne restansar må ein dokumentere utsettingsavtalar med Skatteetaten.
  • Opplyse om kva anna offentleg støtte føretaket har motteke i løpet av 2019, 2020, 2021 og 2022, og korleis denne støtta er heimla (bagatellmessig støtte eller notifisert ordning). Inngår selskapet i eitt konsern må støtte på konsernnivå oppgjevast.
  • Dokumentasjon av tap/kostnader i januar og februar 2022 attestert av rekneskapsførar, i form av
    • Faktisk omsetningstap i januar og februar 2022. Omsetningstapet utgjer differansen mellom omsetning i perioden (januar og februar 2022) samanlikna med omsetning i januar og februar 2020. For nystarta verksemder er samanlikningstala budsjett for januar og februar 2022.
    • Spesifikasjon av kostnader som er ein direkte konsekvens av smitteverntiltak og nedstenging i januar-februar 2022.

 NB viktig: Dersom søkar ikkje innfrir dokumentasjonskrava innan søknadsfristen vil ikkje dokumentasjon bli etterspurt og søknaden vil bli avslegen.

For å sikre at stønaden ikkje fører til kompensasjon ut over lovlege rammer, må søkjar gje opp om verksemda tidlegare har motteke offentleg stønad, stønadsbeløp, under kva for regelverk/kva ordning stønaden er motteken og kva kostnadar som er dekka. Opplysningane er basert på tillit. Dersom søkjar gjev opp feil informasjon, risikerer søkjar at stønad må tilbakebetalast.

Søknad – frist 27. april 2022

  • Regelverk for offentleg støtte gjeld, og midlane blir tildelt under den nasjonalt notifiserte ordninga.
  • Ein forenkla søknad skal sendast inn gjennom regionalforvaltning.no under søknadsskjema med tittel «Kommunal kompensasjonsordning runde 7, nasjonalt notifisert ordning, Sunnfjord kommune». Der skal og eigenerklæring om offentleg støtte og eigenerklæring om verksemda er i økonomiske vanskar fyllast ut.

 For meir informasjon og spørsmål, ta kontakt med Sunnfjord Utvikling:

Sunnfjord Utvikling AS er Sunnfjord kommune si førstelinjeteneste innan næringsutvikling og er sett til å forvalte det kommunale næringsfondet og kompensasjonsmidlane på vegne av kommunen.

,

Vekstregionen Sunnfjord; ein nærings- og ringverknadanalyse – her finn du rapporten

Fredag 25. mars var folk, fart og framtid på agendaen då vi lanserte rapporten «Vekstregionen Sunnfjord».

Visste du at 24 milliardar kroner er estimert omfang på investeringar i Sunnfjord i perioden 2016 – 2032?  Kva er drivkreftene bak desse investeringane? Korleis kan vi rigge oss for vidare vekst framover, og kva utfordringar må vi løyse? Det var nokre av temaene som vart diskutert på lanseringa.

Resultata av nærings- og ringverknadsanalysen gjev god innsikt og set retning, og er også nyttige for alle som driv næring, bur og jobbar i Sunnfjord.

Vi oppmodar alle som ynskjer å bidra til å utvikle Sunnfjord og regionen vidare til å dykke ned i denne rapporten.

Den gjev god innsikt og peikar på nokre viktige retningar for vekst og utvikling. Alle kan bidra, og skal vi lukkast må alle bidra!

Rapporten Vekstregionen Sunnfjord kan lastast ned her.

Har du innspel og tilbakemeldingar på det vidare arbeidet med å styrke buattraktivitet og næringsutvikling i Sunnfjord, så ta kontakt med Sunnfjord Utvikling ved prosjektleiar Bente Hauge på bente.hauge@sunnfjord.no eller tlf. 952 61 359.