Drivkraft deler ut to millionar i stipend i Sogn og Fjordane
Den nye næringsstiftinga Drivkraft lanserer to ulike stipend. Målet er å få fleire gode idéar til å bli nye bedrifter – og fleire bedrifter til å vekse.
Stiftinga Drivkraft lanserer ei pilotordning med stipend på til saman to millionar kroner.
Ordninga består av Drivkraftstipendet på inntil 500 000 kroner og Spirestipendet på 100 000 kroner for unge gründerar.
For framtidas næringsliv
Dagleg leiar Alfred Bjørlo og seniorrådgivar Lillian Loen seier dette markerer startskotet for Drivkraft som operativ aktør i næringslivet i Sogn og Fjordane.
– Vi veit at det finst mange flinke folk med sterke idéar rundt om i Sogn og Fjordane, som kan skape sterke bedrifter i framtida. Det som ofte manglar, er kapital og drahjelp i rett fase. Desse stipenda skal gjere det mogleg for folk og bedrifter å satse meir – og gi gode prosjekt fart, seier Loen.
Drivkraftstipendet rettar seg mot bedrifter med konkrete vekstprosjekt, medan Spirestipendet skal rekruttere fleire unge gründerar.
– Skal vi bygge framtidas næringsliv, må fleire våge å starte. Vi ønsker spesielt å senke terskelen for unge som vil satse på entreprenørskap. Det handlar om langsiktig rekruttering til næringslivet, seier Bjørlo..
For å styrke nyskaping og vekst
Drivkraft understrekar at stipendordningane berre er første steg i eit større arbeid for å styrke nyskaping og vekst i Sogn og Fjordane.
– Stipenda er startskotet. Samtidig jobbar vi med større og meir langsiktige grep for å bidra til meir investeringskraft og vekstevne i det etablerte næringslivet. Skal regionen lykkast, må både nye og eksisterande bedrifter få betre tilgang til kapital, kompetanse og nettverk. Der kjem vi tilbake med endå meir målretta verkemiddel etter kvart, seier dagleg leiar Alfred Bjørlo.
Bjørlo og Drivkraft er også opptatt av den nære koplinga mellom samfunnsutvikling og næringsutvikling i distriktsregionar som Sogn, Sunnfjord og Nordfjord.
– Framtida til Sogn og Fjordane står og fell på vekstkrafta i næringslivet vårt. Skal lokalsamfunna våre vere attraktive å bu og leve i, treng vi eit mangfald av livskraftige bedrifter.
Drivkraft er etablert av SpareBank 1 Sogn og Fjordane og Sparebankstiftinga Sogn og Fjordane for å vere ein motor i arbeidet med å rigge næringslivet i Sogn og Fjordane for framtida.
Du kan lese meir om Drivkraft og stipenda på www.drivkraft.no
